Eze 12 | ZomZIV | STEP | TOPA thu kei tungah hong tunga:

Ezekiel 12

Saltangte Limin Kilak

1 TOPA thu kei tungah hong tunga: 2 “Mihing tapa aw, nang a lehdo mite lakah na teng hi. Amaute a lehdo mi ahi manun mit nei napi mu lo uh a, zak nading bil nei napi khua a za kei uh hi. ^a

3 “Tua ahi ciangin mihing tapa aw, saltang dingin na vanteng guangin amau muh mah in suntangpi in paikhia inla na omna pan mundang khatah pai in. Amaute in a lehdo innkuan ahi uh hangin tel thei kha ding uh hi. 4 Sun hun laitak amau muh mah in na van teng guangin saltang dingin paikhiatpih in. Nitak ciangin amau muhtang mah in saltang dinga paite bangin paikhia in. 5 Amau muh mahmah in kulh tovang inla na vante tua vang panin lakhia in. saltang dinga paite bangin paikhia in. 6 Amau muh mahmah in Amaute muhtang mah in na liangko ah kisuan inla khuamui laitakin puakhia in. Israel innkuante adingin lim khat hong suaksak khin ka hi manin leitang na muh theih loh nadingin na mai hum in,” hong ci hi. ^b

7 Tua ciangin hong thupiak bangin ka hih hi. Suntangpi in ka vante ka guanga saltang dingin ka paikhiatpih hi. Nitak ciangin ka khutin kulh ka khuatvang hi. Khuamial ciangin ka vante khempeuh ka la a, amaute muhtang mahin ka liangko tungah ka pua hi.

8 A zingsang ciangin TOPA thu kei tungah hong tunga: 9 “Mihing tapa aw, a lehdo thei Israel innkuante in, ‘Bang hih na hiam?’ ci-in hong dong lo uh ahi hiam? ^c

10 “Amaute tungah, ‘Hih in Thupipen TOPA gen ahi hi: Hih Pasian thugen in, Jerusalem uk ulianpa le tua lai-a om Israel innkuan buppi tawh kisai ahi hi,’ ci in. 11 Amaute kiangah, ‘Keimah in note adingin lim ka hi hi,’ ci in.

“Ka hih ngeisa bangin amaute tungah ka tungsak ding hi. Amaute kimanin salin kikai ding hi. ^d

12 “Amaute lak pan ulianpa in khuamui ciangin a vante a liangko tungah kisuanin paikhia dinga a paikhiat nading kulh a kitawh vangsak ding hi. Leitang a muh theih loh nadingin a mai a hum ding hi. 13 Amah siahna-in ka len ka zak dinga ka thangah awk ding hi. Keimah in Chaldea-te gam Babylon ah amah ka paipih ding hi; ahi hangin amah in tua gam mu loin tua lai-ah a si ding hi. 14 Amaute kimkotah omte khempeuh - ama zum nasemte le a galkapte khempeuh huih lakah ka thehthang dinga - namsau dawhsa tawh amaute ka nungdelh ding hi. ^e

15 “Minamte lakah amaute ka thehzak a, gam tuamtuam ah a kikhenthang uh ciangin keimah TOPA ka hilam hong thei ding uh hi. 16 Ahi hangin minamte laka a paina peuhpeuh uah a kihhuai amau gamtatnate khempeuh a phawk nadingun namsau pan, kialpi le pulpi panin amaute tawmkha bek ka sit ding hi. Tua ciangin amaute in keimah TOPA ka hilam a thei ding uh hi.,” hong ci hi. ^f

17 TOPA thu kei tungah hong tunga: 18 “Mihing tapa aw, ling kawmin an ne inla lau-a ling kawmin tui dawn in. 19 Gam mite tungah: ‘Hih in Israel gam le Jerusalem a tengte tawh kisai-a Thupipen TOPA gen ahi hi: Amaute in lungzingpi in an ne ding uh a, lungkhampi-in tui a dawn ding uh hi. Ahang in, tua lai-a tengte khempeuh a ngongtatna uh hangin a gam uh le a sunga om na khempeuh a kihawmkhai ding hi. 20 Mihing tenna khuapite a hawm guakin ki-omsak dinga a gam uh gamkhing a suak ding hi. Tua ciangin note in keimah TOPA ka hilam na thei ding uh hi,’ ci hi, ci-in gen in,” hong ci hi.

21 TOPA thu kei tungah hong tunga: 22 Mihing tapa aw, Israel gam sunga na neih uh: ‘Nite in hong khengkheng a, mangmuhna khempeuh lah bangmah a hi kei hi,’ cih paunak bang ahi hiam? 23 Amaute tungah, ‘Hih in Thupipen TOPA gen ahi hi: Keimah in hih paunak ka kizangsak nawn kei dinga, Israelte sungah a kilo kha nawn kei ding hi,’ ci-in gen in. Amaute tungah, ‘Mangmuhna a tangtun ding hun nai ta hi,’ ci in. 24 Ahang in, Israel mite lakah mangmuhna zuau ahikeh aisanna zuau a om nawn kei ding hi. 25 Ahi hangin keimah TOPA in ka deihna ka gen dinga ziakai loin a tangtung ding hi. No a lehdo innkuante aw, na nuntak sungun ka gensate ka tungsak ding hi, Thupipen TOPA in cikhia hi,’ ci-in gen in,” hong ci uh hi. ^g

26 TOPA thu kei tungah hong tunga: 27 “Mihing tapa aw, Israel innkuante in, ‘Ama mangmuhna lah kum tampi cianga tung ding hi-a a mailam thugente lah mailam hun sawtpi cianga tung pan ding ahi hi,’ ci uh hi. ^h

28 Tua ahi ciangin amaute tungah, “Hih in Thupipen TOPA gen ahi hi: Ka kammalte khat beek a ziakai nawn kei ding hi; ka gen peuhmah a tangtung ding hi, Thupipen TOPA in cikhia hi,’ ci-in gen in,” hong ci hi.